古代愛情故事中（指六十年代而巳）的「溝」女術和現代愛情的「」女術比較，標誌着極速文明生活變化！古代四大殺着是：攝影、彈吉他／打band、遊車河和網球／保齡球。

現代攝影是手機上的附設功能，高質傻瓜數碼機愈賣愈平，你識影相好叻咩？你有架Leica好威咩？擔住成副專業攝影器材到處影相（仲要係黑白嘅）女友祗當你係傻仔一名，現代少女要求你懂ICQ，懂把她的相「執」靚放在網上傳情。

你以為彈吉他唱民歌便可打動芳心？現代少女曉得誰是Joan Baez、Bob Dylan、Peter & Gordon嗎？連PPM已做了阿公阿婆，還手牽手上台唱民歌，老唔老土啲呀？現代「溝」女勝地是唱K，還要有五十幾首識背歌詞嘅最新「飲歌」才入流，到的士高fing頭才夠潮！

揸住架錢七小跑車看看現在還有沒有女仔吼你？又震又冇冷氣。最低標準是真皮座位十六喇叭麥花臣避震全天候恆温moonlight天窗大包圍四驅車，駕駛途中，能掟一兩個情人灣為佳。

網球教練，今天已買少見少；「碌拎」？咪攪我！連許長發都死咗！到Driving Range俾個靚swing妳睇吓，教妳打golf才潮爆啊！球癡老陳一味勸他十二歲獨仔學打高球：「阿仔，老豆真的冇呃你，學打golf對你將來女真的有着數架！（完）

#####

本文原登於《明報周刊》專欄〈高球型而尚〉，現經作者修訂重刊。

[ #高球型而尚 ]